YASHIL IQTISODIYOT SHAROITIDA TA’LIMNING O’ZIGA XOS XUSUSIYATLARI: MUAMOLAR, YECHIMLAR VA ISTIQBOLLAR

Abstrak

Ushbu maqolada yashil iqtisodiyot sharoitida ta’lim tizimining roli, ahamiyati va o‘ziga xos xususiyatlari har tomonlama yoritilgan. Yashil iqtisodiyot — bu iqtisodiy o‘sishni atrof- muhitga zarar yetkazmasdan ta’minlovchi barqaror rivojlanish modelidir. Bunday iqtisodiy modelni amalga oshirish uchun ekologik ongli, mas’uliyatli va zamonaviy bilimlarga ega bo‘lgan inson kapitali zarur bo‘ladi. Bu esa, o‘z navbatida, ta’lim tizimida tub islohotlarni talab etadi. Maqolada O‘zbekiston ta’lim tizimida yashil iqtisodiyotga oid mavjud yondashuvlar, fanlararo integratsiya, pedagog kadrlar tayyorlashdagi muammolar, o‘quv dasturlarining yetarli emasligi, texnologik infratuzilma va amaliyotga yo‘naltirilmagan ta’lim jarayonlari tanqidiy tahlil qilingan. Xalqaro tajriba misolida ekologik kompetensiyalarni shakllantirishning samarali usullari o‘rganilgan hamda ularni milliy tizimga moslashtirish bo‘yicha takliflar berilgan. Shu bilan birga, maqolada ekologik savodxonlikni oshirish, ta’limda “yashil” innovatsiyalarni joriy qilish va yoshlar orasida ekologik madaniyatni targ‘ib qilish istiqbollari ham ko‘rib chiqilgan. Tadqiqot natijalari asosida ta’lim tizimini yashil iqtisodiyot tamoyillariga moslashtirish bo‘yicha amaliy tavsiyalar ishlab chiqilgan.